بتناديه ومش بيرد عليكي؟ بتتكلمي معاه بس بتحسيه في عالم تاني بعيد عنك وحتى عينه مابتكونش معاكي؟

مابيعرفش يعبر عن مشاعره زي باقي الأطفال ورافض إن حد يقرب منه أو يلمسه؟??

التوحد من الأمراض اللي بتحتاج ملاحظة سريعة منك إنتي وباباه عشان تقدروا تطلبوا الدعم والمساعدة من المتخصصين?

وعشان كده احنا هنساعدك ونشرحلك كل حاجة تخص التوحد وهنقولك أعراضه وأسبابه وازاي تتعاملي مع ابنك لو اتشخص بيه.

إيه هو التوحد؟

التوحد هو واحد من اضطرابات التطور اللي بتأثر على كيفية وأسلوب تفاعل الشحص المصاب مع غيره، وعلى التواصل معاهم والتعلم والتصرف كمان.

وبالرغم إن ممكن تشخيص التوحد يكون في أي عمر إلا إنه  بيتوصف بـ «اضطراب في النمو» لإن أعراضه بتظهر في سن الرضاعة قبل بلوغ الطفل  3 سنين?‍?

خطورة وأعراض مرض التوحد مش ثابتة في كل الحالات وبتختلف من حالة للتانية، بس عمومًا كل الاضطرابات اللي من النوع ده بتأثر على قدرة الطفل على الاتصال مع الأفراد حواليه وبيكون صعب عليه يبني علاقة متبادلة معاهم?

وعشان نسهل طريقة فهم الصعوبات اللي بتواجه الطفل وطرق التعامل معاه قسمنا المشاكل اللي بتحصله لـ 3 مجالات:

 ١- العلاقات الإجتماعية المتبادلة.

 ٢- اللغة.

 ٣- السلوك.

بس الطفل كل ما بيكبر ممكن قدرته على الاختلاط والاندماج  بتزيد حسب طبيعة حالته وتطورها واستجابتها، ففي منهم بيقدر يعمل ده بصورة أفضل?

أنواع الأطفال المصابين بالتوحد.

عشان نسهلها عليكي قسمنا الأطفال المصابين بالتوحد لـ 3 أنواع:

 ١- طفل بطئ في إنه يتعلم معلومات ومهارات جديدة?‍???️

 ٢- طفل بيتمتع بنسبة ذكاء طبيعية وممكن تكون أعلى كمان من الطبيعي? الطفل ده بيتعلم بسرعة بس بيكون عنده مشاكل في الاتصال وإنه يطبق الحاجات اللي اتعلمها في حياته اليومية.

 ٣- طفل بيكون مثقف وبيكون عنده مهارات استثنائية وفريدة، وبتكون في مجال معين زي الفن أو الموسيقى أو الرياضيات??

أعراض التوحد.

لإن كل حالة بتختلف عن التانية، فـ كل طفل بيعاني من التوحد بيظهر أعراض وطباع خاصة بيه، بس بيكون في أعراض شائعة للاضطراب ده وهنعرفهم سوا، فمثلًا اللي عنده مشكلة في مهاراته الإجتماعية:

? بيتأخر في الكلام.

? مش بيستجيب لما بتناديه باسمه.

? بيبان عليه إنه مش بيسمعك وأنت بتكلمه.

? بيرفض العناق.

? بيحب يلعب لوحده وكإنه في عالم خاص بيه.

? عنده مشكلة في الاتصال البصري المباشر.

? بيتكلم بنبرة مش طبيعية، وممكن تكون شبه الإنسان الآلي.

? بيكرر الكلمات والجمل بس مش بيكون عارف ازاي يستخدمها.

?مش بيعبر عن مشاعره وبيكون مش مدرك لمشاعر غيره.

? عنده مشكلة في إنه يتعرف على الإشارات الغير لفظية زي إنه يفسر تعبير وش اللي قدامه.

طب لو الطفل ده عنده اضطراب ومشاكل سلوكية، هيكون بيتصرف ازاي؟

♦ بيكرر حركات زي الاهتزاز واللف في دواير.

♦ بيكون عنده عادات وطقوس بيكررها دايمًا.

♦ بيتعصب لو حصل أي تغير في العادات أو الطقوس بتاعته حتى لو تغيير بسيط.

♦ بيكون دائم الحركة.

♦ بيكون عنده حساسية شديدة للضوء أو الصوت أو اللمس، بالرغم من ده مش بيفرق معاه احساسه بالألم.

♦ بيبقى عنده صعوبة في مشاركة تجاربه مع غيره.

♦ بينبهر بتفاصيل حاجة معينة زي دوران العجل في عربية لعبة.

♦ ممكن يعمل حاجات تسببله أذى زي العض وضرب الرأس.

♦ بيكون عنده تفضيل لأطعمة معينة ورفض لأطعمة بملمس معين.

♦ عنده أنماط حركة غريبة زي الحركات غير المتزنة أو إنه يمشي على صوابع رجله.

ليه مرض التوحد ده بيحصل أصلًا وإيه أسبابه؟

في أسباب مختلفة ممكن تؤدي للتوحد وهي:

1- العوامل الوراثية: الأبحاث اكتشفت وجود چينات معينة بيكون ليها دور في حدوث التوحد، وده لإنها بتأثر على نمو الدماغ وتطوره، وعلى طريقة اتصال خلايا الدماغ ببعضها، وده ممكن يتنقل بالوراثة أو يظهر بشكل تلقائي.

2- العوامل البيئية: في أبحاث بتقول إن في احتمال يكون سببه عدوى ڤيروسية أو التلوث البيئي، وإنهم عامل في ظهور التوحد.

3- في عوامل تانية لسه بيدرسوها زي مشاكل وقت مخاض الولادة أو دور الجهاز المناعي، أو حدوث ضرر في «اللوزة» وهي جزء من الدماغ، فممكن ده يكون عامل من العوامل اللي بتحفز ظهور المرض.

عوامل خطورة الإصابة بالتوحد.

كده احنا عرفنا أسبابه، فهل بقى في عوامل بتزود فرصة ظهوره، وبتخلي الطفل أكتر عُرضة للإصابة بيه عن غيره؟??

ايوه فيه، زي مثلًا:

جنس الطفل: احتمال إصابة الولد اكبر ٣ أضعاف من البنت♀️♂️

التاريخ العائلي: العيلة اللي بيكون عندها طفل مصاب بالتوحد، بيكون عندها احتمال اكبر إنهم يخلفوا طفل تاني مصاب بالمرض?‍?‍?‍? 

مشاكل طبية تانية: ممكن الطفل يكون بيعاني من مشاكل طبية معينة بتخليه عُرضة اكتر من غيره للإصابة، زي مثلًا:

   • متلازمة الكرموسون إكس الهش.

   • التصلب الحدبي.

   • متلازمة ريت.

   • الصرع.

الولادة المبكرة: الأطفال اللي اتولدوا قبل مرور ٢٦ أسبوع بيكونوا اكتر عُرضة للمرض.

عُمر الأب: لو سنه فوق الأربعين أطفاله بيكونوا اكتر عُرضة للإصابة.

أكيد دلوقتي بتسألي نفسك ازاي تكتشفي إن طفلك مُصاب بالتوحد؟

كل طفل مختلف عن التاني يعني مفيش قاعدة لمواعيد ثابتة لنموهم وتطورهم.

 بس بيظهر على الطفل المصاب باضطراب التوحد علامات للتأخر في النمو قبل بلوغه سنتين، وغالبًا بتظهر العلامات دي بدري في مرحلة النمو، زي التأخر الواضح في مهارات اللغة والتفاعلات الإجتماعية?️

عشان كده هنقولك علامات لو ظهرت على طفلك مهم تستشيري الطبيب:

? لو طفلك عنده 6 شهور ومش بيستجيبلك بابتسامة أو بيعبر عن السعادة.

? لو طفلك عنده 9 شهور ومش بيقلد الأصوات ولاحظتي عدم وجود تعابير على وشه.

? لو طفلك عنده سنة ومبدأش يحاول يتكلم أو يصدر صوت.

? لو طفلك عنده سنة وشهرين ومش بيعمل حركات معينة زي إنه يشاور مثلًا.

? لو طفلك عنده سنة و4شهور ومش بينطق كلمات متفرقة.

? لو طفلك عنده سنة ونص ومش بيلعب ألعاب «التخيل» أو التظاهر.

? لو طفلك عنده سنتين ومش بينطق جمل بتتكون من كلمتين.

? لو فقد مهارات اللغة أو المهارات الاجتماعية في أي عُمر.

وقتها هيقوم الطبيب بعدة فحوصات واختبارات للطفل عشان يقيم قدراته الكلامية واللغوية، وهيفحص بعض الجوانب النفسية عنده.

عشان كده لازم تعرفي إن التشخيص المبكر له أهمية كبيرة جدًا، وده لإن التدخل المُبكر وخصوصًا قبل بلوغ الطفل 3 سنوات بيكون له دور مهم في تحقيق أفضل الاحتمالات والفرص لتحسين الحالة.

طيب دلوقتي ابني أو بنتي اتشخصوا بالتوحد، اتصرف معاهم ازاي؟

أهم حاجة إن لو ابنك مصاب بالتوحد ومش عارفه ازاي تتعاملي معاه، فلازم تعرفي إن ده مش معناه إنك مقصرة معاه، هو بس بيكون صعب عليه يتواصل معاكي أو يعبر عن اللي جواه، وده بيصعب عليكي مهمتك.

عشان كده هنقولك على شوية نصايح تساعدك تتعاملي معاه:

  - اعرفي حالة طفلك وإيه الحاجات اللي بتأثر عليه.

  - خليكي صبورة واختاري كلمات واضحة وإنتي بتتكلمي معاه، لإنه بيفهم الكلام بشكل مباشر بس. 

  - ساعديه يعبر عن مشاعره بطريقة صحية، فمثلاً لو بيحب الرسم فدي هتكون وسيلة كويسة، فممكن تستخدمي كروت المشاعر ??ودي رسومات بيبقى فيها تعابير وش مختلفة خلي طفلك يستخدمها عشان يتواصل ويعبر عن  مشاعره صح.

  - اتجاهلي أي سلوك مزعج يعمله، واتكلمي عن السلوك الجيد واشرحيله بطريقة بسيطة وكافئيه لما يعمل سلوك كويس.

  - طفلك محتاج احتواء وحضنك مهم عنده أكتر من أي طفل تاني، بس في أطفال مش بيحبوا حد يلمسهم، فـ مهم جدًا تحترمي ده.

  - خليكي مرنة ومتفهمة، هو ممكن يقول كلام أو يعمل تصرف بطريقة غلط فبلاش تاخدي ده على محمل شخصي، هو مش بيعرف يظهر عواطفه ولا يتحكم فيها.

  - اتفاعلي معاه بالنشاط البدني زي الجري واللعب، ده هيديكي وقت أطول تشاركيه معاه ومن غير ما يحس بالضغط.

  - اظهري وبيني حبك واهتمامك بيه ودعمك له.

  - وماتنسيش إنك محتاجة متخصص يتابع حالته ويوجهك إنتي وأسرتك للخطوات اللي هتساعد طفلك وتحسن حالته.

اضطراب التوحد الافتراضي.

طب كده احنا اتكلمنا عن اضطراب التوحد، إيه هو بقى التوحد الافتراضي ده اللي في ناس بتتكلم عليه؟??

أطفال كتير حوالينا عندهم مشكلة التوحد الافتراضي، وده بسبب إنهم بيقعدوا وقت طويل قدام الشاشات وبيبقوا معزولين عن اللي حواليهم?

التوحد الافتراضي بيشبه التوحد الحقيقي، وده لإن مشاهدة الشاشات لفترة طويلة بيأثر على تطور الدماغ وبيسبب مشاكل سلوكية عند الطفل، وده بيأثر على:

  - إدراك الطفل.

  - عاطفة الطفل.

  - اختلاف نموه عن الأطفال اللي في نفس سنه.

  - تغيير في سلوكياته.

عشان كده مهم تستبدلي الشاشات دي بحاجات مفيدة اكتر للطفل زي:

✅ أنشطة تعليمية. 

✅ حرف يدوية. 

✅ ألعاب تفاعلية. 

✅ الرقص والحركة.

✅ حصص الموسيقى.

✅ اللعب خارج المنزل ومع الحيوانات.

✅ القراءة.

✅ ممارسة الرياضة.

✅ وبلاش تمنعي استخدامه للشاشات نهائي، بس حددي الوقت المناسب لسنه، يعني من سنتين لـ 5 سنين مسموح بساعة في اليوم، وفوق الـ 5 سنين مسموح بساعتين في اليوم، فحاولي تقسمي الوقت ده على مدار اليوم عشان طفلك ميحسش إنك حرمتيه من حاجة معينة، وكمان عشان ميتعرضش كل الوقت ده مرة واحدة.

✅ كمان ما تنسيش إن الوقت اللي بتخصصيه ليكي إنتي وطفلك لوحدكوا بعيد عن أي حاجة تانية بيكون مهم مهم جدًا، لإنك بكده بتقربي منهم اكتر وبتفهمي دماغه وتفكيره، وده هيسهل عليكي تربيته بشكل صح وهيحميه من مخاطر ومشاكل كتير ممكن يتعرضلها طول حياته مش وهو صغير بس.